ប្រតិកម្មភរិយាលោក Trump យ៉ាងណា​​ពេល​ក្មេង​​ម្នាក់​​ស្រែក​ ខណៈឃើញ​ Minho?

ពិត​ជា​សំណាង​ណាស់ ក្មេង​ស្រី​ជន​ជាតិ​កូរ៉េ​ខាង​ត្បូង​ម្នាក់​បាន​ឈរ​ជិត​លោក​ស្រី​ Melania Trump តែ​អ្វី​ដែល​គួរ​ឲ្យ​ភ្ញាក់​ផ្អើល​ជាង​នេះ​ទៀត​នោះ​គឺ​នៅ​ពេល​ដែល​នាង​បាន​ឃើញ​តារា​ដ៏​ល្បី​ម្នាក់​ឈរ​ពី​ក្រោយ​នាង​។

កាល​ពី​ថ្ងៃ​អង្គារ​កន្លង​ទៅ ក្មេង​ស្រី​ជន​ជាតិ​កូរ៉េ​ខាង​ត្បូង​ម្នាក់​ដែល​បាន​ឈរ​ជិត​លោក​ស្រី​ Melania Trump (ភរិយា​ប្រធានាធិបតី​សហរដ្ឋអាមេរិក Donald Trump) មាន​ការ​ភ្ញាក់​ផ្អើល​ជា​ខ្លាំង​នៅ​ពេល​ដែល​ដឹង​ថា ខ្លួន​ឈរ​នៅ​ពី​មុខ​តារា​ចម្រៀង​កូរ៉េ​ដ៏​ល្បី​ Choi Min-ho នៅ​ក្នុង​កម្មវិធី​​កីឡា​មួយ​អំឡុង​ពេល​នៃ​ដំណើរ​ទស្សនកិច្ច​របស់​ ប្រធានាធិបតី​អាមេរិក​លោក Donald Trump មក​កាន់​ប្រទេស​កូរ៉េ​ខាងត្បូង។

ជាក់​ស្ដែង​ នៅ​ពេល​ក្មេង​ស្រី​សិស្ស​សាលា​ម្នាក់​នោះ​កំពុង​ឈរ​ជជែក​កម្សាន្ត​ជាមួយ​នឹង​លោក​ស្រី​Melania តារា​ចម្រៀង​ដែល​ជា​សមាជិក​ក្រុម SHINee និង​ជា​តារា​សម្ដែង​ដ៏​ល្បី​ល្បាញ​ផង​នោះ​ បាន​ឈរ​នៅ​ពី​ក្រោយ​ខ្នង​នាង។

ពេល​នោះ​មិត្ត​ភក្តិ​របស់​នាង​ម្នាក់​ ស្រាប់​តែ​ឃើញ​ Minho ហើយ​ភ្ញាក់​ផ្អើល​ចំពោះ​វត្តមាន​លោក ជា​ហេតុ​ធ្វើ​ឲ្យ​ក្មេង​ស្រី​ដែល​ឈរ​នៅ​ជិត​លោក​ស្រី​ Trump ងាក​មើល​ក្រោយ​ហើយ​ក៏​ចាប់​ផ្ដើម​ស្រែក​តែ​ម្ដង។ ចំណែក​ភរិយា​របស់ Trump ពេល​ឃើញ​ក្មេង​ៗ ស្រែក លោក​ស្រីក៏ផ្ទុះ​សំណើច និង​ងាក​មើល​មុខ​ Minho ដោយ​ក្ដី​រីករាយ៕

Source:http://news.sabay.com.kh