ទើប​តែ​ចេញ iPhone X ត្រូវ​រាយការណ៍​ថា ធ្លាក់​បែក​ច្រើន​ជាង​គេ​នៅ​ចិន

យ៉ាង​ហោច​ណាស់ អតិថិជន​របស់ Apple ចំនួន ៣​រូប បាន​បង្ហោះ​រូបភាព និង​វីដេអូ បង្ហាញ​ពី iPhone X ដែល​ពួកគេ​ទើប​តែ​ទិញ ដើម្បី​បង្ហាញ​ពី​ការ​ងាយ​បែក​របស់​ស្មាតហ្វូន​ចុងក្រោយ​មួយ​នេះ ដែល​មាន​តម្លៃ​ជាង ១២០០ ​ដុល្លារ នៅ​ប្រទេស​ចិន​។

Apple Store នៅចិន បើកលក់ iPhone X

iPhone X ត្រូវ​បាន​បញ្ចេញ​លក់​ជា​ផ្លូវការ​នៅ​លើ​ទីផ្សារ​ទូទាំង​ពិភពលោក កាលពី​ម្សិលមិញ។ ស្មាតហ្វូន​នេះ បំពាក់​ដោយ​កញ្ចក់​ដូច​មាន​នៅ​លើ iPhone 8 ដែរ។ ដូច្នេះ វា​ងាយ​នឹង​បែក បំផុត​នៅ​ពេល​ធ្លាក់។

អ្នកគាំទ្រ Apple ម្នាក់ បាន​បង្ហោះ​វីដេអូ​មួយ​បង្ហាញ​ពី​ការ​បែក iPhone X នៅ​លើ​បណ្ដាញ​សង្គម Weibo នៅ​ទីតាំង​លក់ iPhone មួយ​កន្លែង​នៅ​ប្រទេស​ចិន។ ចំណែក ស្ត្រី​ម្នាក់​ទៀត ឈ្មោះ Ba Hao Wan Zi Jiang ក៏​បាន​បង្ហោះ​ដូចគ្នា​ពី​ការ​បែក​កញ្ចក់​នៅ​គែម​អេក្រង់ iPhone X ពណ៌​ប្រាក់​របស់​ខ្លួន ដែល​ទើបតែ​ទិញ។ នាង​បាន​បញ្ជាក់​ថា iPhone របស់​នាង បាន​ធ្លាក់​នៅ​លើ​ឥដ្ឋ​ការ៉ូ។