មិនចាំបាច់ពិនិត្យ DNA ទេ ! ពេជ្រ ថៃ បង្ហាញសំបុត្រកំណើតហើយ !

បន្ទាប់ពីផ្ទុះរឿងរ៉ាវចចាមអារ៉ាមលើកុមារា ពេជ្រ ថៃ ដែលជាម្ចាស់ពាន The Voice Kids Cambodia 2017 ពីរបីថ្ងៃជាប់គ្នាមកនេះ ដែលថារូបគេមានអាយុ ១៥ ទៅ ១៦ ឆ្នាំនោះ ក៏ធ្វើឱ្យសាមីខ្លួនឈឺក្បាលវិលមុខកើតទុក្ខមិនសប្បាយចិត្ត ចេញសារត្អូញត្អែរក្នុងន័យសុំឱ្យបញ្ឈប់ការវាយប្រហាររូបគេម្តងរួចមកហើយ ។

ទាក់ទងឹនឹងរឿងរ៉ាវខាងលើនេះ មានមហាជនជាច្រើនមានការងឿងឆ្ងល់យ៉ាងខ្លាំង ដោយខ្លះក៏ជឿ ខ្លះក៏មិនជឿ ហើយម្នាក់ៗអន្ទះសាចង់ដឹងការពិតពីអាយុរបស់ម្ចាស់ពានរូបនេះ ។ ឥឡូវនេះច្បាស់ការណ៍ហើយ ព្រោះម្ចាស់ខ្លួនបានបង្ហាញពស្តុតាងយ៉ាងច្បាស់ជាលាយលក្ខណ៍អក្សរផង គឺសំបុត្របញ្ជាក់កំណើតរបស់ខ្លួនដែលចេញដោយមន្ត្រីអត្រានុកូលដ្ឋាន ឃុំជ្រៃ ស្រុកមោងឫស្សី ខេត្តបាត់ដំបង នោះ ដើម្បីបញ្ចប់រឿងនេះ ។

នៅក្នុងសំបុត្រកំណើតរបស់កុមារា ពេជ្រ ​ថៃ បញ្ជាក់ថា រូបគេកើតនៅថ្ងៃទី ២៤ ខែ មីនា ឆ្នាំ ២០០៤ ដូច្នេះបើគិតមកដល់ពេលនេះ ពេជ្រ ថៃ ទើបតែមានអាយុ ១២ ឆ្នាំ ៧ ខែជាងប៉ុណ្ណោះ គឺមិនមែន ១៥ ឬ ១៦ ឆ្នាំដូចការចោទប្រកាន់បែបចចាមអារ៉ាមនោះឡើយ ៕