ខ្មែរកម្ពុជាក្រោមអះអាងថា ពួកគាត់សុខចិត្តខ្ចីលុយគេ ដើម្បីទិញទូកងមួយ ចូលរួមប្រណាំងនៅខាងមុខព្រះបរមរាជវាំង នៅក្នុងឱកាសព្រះរាជពិធីបុណ្យអុំទូកនៅឆ្នាំនេះ។ ការចូលរួមប្រណាំងទូកនៅឆ្នាំនេះ ជនជាតិខ្មែរដើមកម្ពុជាក្រោមយល់ថា ដើម្បីចូលរួមរក្សាអត្តសញ្ញាណខ្មែរក្រោម គឺជាជនជាតិខ្មែរដើម និងចង់ប្រាប់ពិភពលោកថា ខ្មែរកម្ពុជាក្រោម នៅតែរក្សាប្រពៃណីបានយ៉ាងល្អ។
ក្រោមក្រសែភ្នែកទស្សនិកជនជាច្រើន នៅអមតាមមាត់ទន្លេសាប ម្ដុំព្រះបរមរាជវាំង ទូកងឈ្មោះ ខ្មែរកម្ពុជាក្រោមមានជ័យ បានបង្ហាញខ្លួន បោះពួយយ៉ាងឡូយ ក្នុងផ្ទៃទឹក។ ឯកសណ្ឋានរបស់ទូកខ្មែរក្រោម មាន២ពណ៌ គឺ ម្ដុំចំណុះក្បាលទូកពណ៌ខៀវ ចំណុះកណ្ដាលទូកពណ៌លឿង និងអ្នកនៅម្ដុំកន្ទុយទូក មានឯកសណ្ឋានពណ៌ក្រហម។ នៅឆ្នាំនេះទូកងខ្មែរកម្ពុជាក្រោមមានជ័យ បានរចនាថ្មី ដោយទិញទូកថ្មីមួយយ៉ាងលឿន ដើម្បីប្រកួត ប្រាថ្នាជ័យជំនះលេខ១នៅឆ្នាំនេះ។
ប្រធានគណៈកម្មការទូកង ខ្មែរកម្ពុជាក្រោមមានជ័យ គឺ លោក ប៊ុន មុនី រៀបរាប់ថា ដោយសារតែទូកង ខ្មែរកម្ពុជាក្រោមមានជ័យដែលអុំរាល់ឆ្នាំ មានសភាពចាស់ ទ្រុឌទ្រោម និងពិបាកក្នុងការកែសម្រួលយកមកអុំវិញបាន គណៈកម្មការទូក បានសម្រេចទិញទូកថ្មី ដើម្បីចូលរួមប្រកួតប្រជែងនៅឆ្នាំនេះ សំដៅរកលេខ១។ លោក ប៊ុន មុនី អះអាងថា ទូកងដែលទិញថ្មីនេះ ថ្វីបើលឿនខ្លាំងមែន ប៉ុន្តែគណៈកម្មការមិនមានថវិកាសម្រាប់ទិញទូកទេ គឺជំពាក់គេទាំងស្រុង។ ការជំពាក់ដែលត្រូវបែងចែកជាពីរ គឺមួយជំពាក់លុយរបស់គណៈកម្មការទូក និងជំពាក់ម្ចាស់ទូក។ តែយ៉ាងណា លោក និងគណៈកម្មការទូកសង្ឃឹមថា អាចធ្វើឲ្យខ្មែរ និងបរទេស នៅទូទាំងពិភពលោក បានដឹងថា ខ្មែរក្រោមគឺជាជនជាតិខ្មែរពីបរមបុរាណមក។ «សំឡេង»
ទូកងខ្មែរកម្ពុជាក្រោមមានជ័យ គឺជាទូកខ្នាតអន្តរជាតិ ដែលមានចំណុះ (កីឡាអុំ) ២២នាក់ ប្រវែង១៨ម៉ែត្រ ធ្វើពីដើមគគីរទាំងមូល ដោយលុងចូលក្នុង និងមានតគែមលើបន្តិច ដើម្បីការពារកុំឲ្យទឹកចូលក្នុងទូកនៅពេលប្រើកម្លាំងខ្លាំងពេលប្រណាំង។
លោក ប៊ុន មុនី មើលឃើញថា ទូកងថ្មីរបស់ខ្មែរកម្ពុជាក្រោមនេះ លឿនជាងមុន និងមានសង្ឃឹមខ្ពស់ថា ទទួលបានជ័យលាភីលេខ១ ក្នុងឆ្នាំនេះ។ លោកអះអាងថា ថ្វីបើទូកងនេះ ឈ្មោះខ្មែរកម្ពុជាក្រោម និងទទួលបានការឧបត្ថម្ភជ្រោមជ្រែងពីខ្មែរក្រោមនៅក្នុងប្រទេសកម្ពុជា និងក្រៅប្រទេសក្ដី ប៉ុន្តែកីឡាករអុំទូកងនេះ មិនមែនសុទ្ធតែជាខ្មែរក្រោមនោះទេ គឺមានទាំងជនជាតិខ្មែរកើតនៅទឹកដីកម្ពុជា និងជនជាតិខ្មែរឥស្លាម។
ខ្មែរឥស្លាមម្នាក់ គឺជាកីឡាករចំណុះទូកងខ្មែរកម្ពុជាមានជ័យ បង្ហាញក្ដីសប្បាយរីករាយ នៅពេល សួរថា តើយល់បែបណាចំពោះការអុំទូកឲ្យទូកងខ្មែរក្រោម។ បើទោះយ៉ាងណា ខ្មែរឥស្លាមរូបនេះ មានផលវិបាកតែមួយគត់ គឺការបរិភោគអាហារខុសពីជនជាតិខ្មែរដើមកម្ពុជាក្រោម។
កីឡាករម្នាក់ទៀត គឺជាជនជាតិខ្មែរ ឈ្មោះ ប៉ាត នី គឺជាកីឡាករអុំនៅបន្ទាប់ពីអ្នករាំក្បាលទូក អះអាងថា លោកពេញចិត្តក្នុងការចូលរួមអុំទូកជាមួយខ្មែរក្រោម។ លោក ប៉ាត នី គឺជាជនជាតិខ្មែរ នៅស្រុកព្រៃនប់ ខេត្តព្រះសីហនុ។ អតីតអ្នកនេសាទដែនសមុទ្ររូបនេះ បញ្ជាក់ថា លោកធ្លាប់មានបទពិសោធន៍ប្រណាំងទូកនៅសមុទ្រ ដែលមានចំណុះ ៤នាក់ ក្នុងមួយទូក។ ប៉ុន្តែ ទោះជាយ៉ាងណា លោកប្រាប់ថា កីឡាទូក រួមទាំងកីឡាករបម្រុងមានទាំងអស់២៧នាក់ បានហ្វឹកហាត់ កន្លះខែមុនមកហើយ និងមានការស្ទាត់ជំនាញសម្រាប់ការអុំទូកងខ្នាតអន្តរជាតិនេះហើយ។
ទូកង ខ្មែរកម្ពុជាក្រោមមានជ័យ គឺជាទូករបស់វត្តសាមគ្គីរង្សីមានជ័យ ស្ថិតក្នុងខណ្ឌមានជ័យ រាជធានីភ្នំពេញ ជាទូក និងជាវត្តរបស់ជនជាតិខ្មែរដើម មកពីទឹកដីកម្ពុជាក្រោម ឬបច្ចុប្បន្នជាទឹកដីភាគខាងត្បូងរបស់ប្រទេសវៀតណាម។
ប្រធានគណៈកម្មការជ្រើសរើសកីឡាករទូកងខ្មែរកម្ពុជាក្រោមមានជ័យ លោក អ៊ុន ចាន់ ប្រាប់ថា វិធីសាស្ត្រក្នុងការរើសកីឡាករ លោកបានសម្រិតសម្រាំងយ៉ាងខ្លាំង និងជ្រើសរើសសុទ្ធតែកីឡាករដែលមានបទពិសោធន៍ និងសណ្ដានចិត្តអាណិតអាសូរខ្មែរក្រោម។
ក្រុមកីឡាករចម្រុះជាតិសាសន៍ នៃទូកងខ្មែរកម្ពុជាក្រោមមានជ័យ នៅពេលយប់ត្រូវបានគណៈកម្មាធិការជាតិរៀបចំបុណ្យជាតិ អនុញ្ញាតឲ្យសម្រាកនៅក្នុងរោង ប្រក់ស័ង្កសី លើដីអភិវឌ្ឍន៍តំបន់ជ្រោយចង្វារ របស់ក្រុមហ៊ុន អូស៊ីអាយស៊ី (OCIC) ដូចកីឡាទូកងដទៃទៀត។ នៅក្នុងរោងសម្រាករបស់កីឡាករ ទូកង ខ្មែរកម្ពុជាក្រោមមានជ័យ ក៏មិនខុសពីកីឡាកររបស់ទូកងដទៃទៀតដែរ។ កីឡាករចំណុះទូកត្រូវបានគណៈកម្មការគ្រប់គ្រងសាមីទូក ឲ្យចូលសម្រាកតាំងពីពិសាបាយក្បាលព្រលប់រួចរាល់។ កីឡាករខ្លះ សម្រាន្តក្នុងមុងដែលដាក់ពីផ្ទះទៅ ឯកីឡាករខ្លះទៀត សម្រាន្តនៅលើប៉ាវអ៊ី ឬក្ដាររនាមតុពិសាបាយដាក់តម្រៀបគ្នា។ អ្នកខ្លះ ក៏មិនមានមុងសម្រាន្តដែរ កីឡាករខ្លះទៀត សម្រាន្តនៅលើអង្រឹង ដោយប្រើថ្នាំសម្លាប់មូសបាញ់មូល ឬដុតធូបមូស។
ក្នុងមួយថ្ងៃ កីឡាករចំណុះទូកង ខ្មែរកម្ពុជាក្រោមមានជ័យ ទទួលបានរបបអាហារ ៣ពេល ដោយចុងភៅនឹងលៃលកកែច្នៃម្ហូប មិនឲ្យជាន់គ្នានោះទេ និងត្រូវបែងចែកម្ហូបរបស់ខ្មែរឥស្លាម ផ្សេងពីម្ហូបរបស់ជនជាតិខ្មែរ និងខ្មែរកម្ពុជាក្រោម។ ប្រធានចុងភៅ នៃទូកងខ្មែរកម្ពុជាក្រោមមានជ័យ អ្នកស្រី យ៉ាត ថា ម្ហូបអាហារដែលផ្គត់ផ្គងសម្រាប់កីឡាករទូកងខ្មែរក្រោម បានមកពីការជួយរបស់សប្បុរសជននានា ពិសេសអ្នកភូមិខ្មែរក្រោម ក្នុងភូមិខ្មែរសាមគ្គី។ «សំឡេង»
ប្រធានគណៈកម្មការទូកង ខ្មែរកម្ពុជាក្រោមមានជ័យ លោក ប៊ុន មុនី អះអាងថា ទូកងខ្មែរកម្ពុជាក្រោមនេះ មិនទទួលបានការឧបត្ថម្ភពី មន្ត្រីធំៗ ឬឥស្សរជនណាឡើយ។ ប៉ុន្តែ អ្វីដែលទទួលបានការឧបត្ថម្ភ ទាំងថវិកា និងម្ហូបអាហារ គឺបានមកពីពលរដ្ឋខ្មែរទូទាំងពិភពលោក។ បើទោះបែបនេះក្ដី លោក ប៊ុន មុនី អះអាងថា ទូកងខ្មែរកម្ពុជាក្រោមមានជ័យ មិនប្រកែកក្នុងការទទួលយកជំនួយពីមន្ត្រីរដ្ឋាភិបាល ឬអាជ្ញាធរណាឡើយ គឺមានតែការស្នើសុំ។ លោក ថា កន្លងមកគណៈកម្មការទូកងខ្មែរក្រោម ក៏ធ្លាប់ធ្វើលិខិតដើម្បីស្នើសុំថវិកាខ្លះ ពីមន្ត្រីធំៗដែរ ប៉ុន្តែ ក្រោយការស្នើសុំមិនមានឆ្លើយតបវិញ គណៈកម្មការទូក មានតែសង្ឃឹមលើជនជាតិខ្មែរទាំងនៅក្នុង និងក្រៅប្រទេស។ «សំឡេង»
នៅឯមាត់ទន្លេសាបឯណោះវិញ ទូកងខ្មែរកម្ពុជាក្រោមមានជ័យ នៅពេលយប់ ត្រូវបានព្រះសង្ឃខ្មែរក្រោមពីរអង្គ នៅថែរក្សារាល់យប់។ ព្រះសង្ឃខ្មែរក្រោមមួយអង្គ មានព្រះថេរៈដីកា បន្ទាប់ពីធ្វើពិធីសាសនានៅលើទូករួចរាល់ថា រាល់ទូកងទាំងអស់ សុទ្ធតែមានបារមីកាន់កាប់។ ព្រះអង្គ នៅសិង្ហរាល់យប់ដើម្បីដាស់ព្រលឹងទូក និងជួយខ្មែរក្រោមតាមបែបសាសនា។ ព្រះអង្គយល់ថា អ្វីដែលព្រះអង្គជួយបាន គឺការចូលរួមតាមរយៈសាសនា ដើម្បីជួយថែរក្សាទូកង ខ្មែរកម្ពុជាក្រោម ក្នុងបំណងឲ្យអន្តរជាតិ និងជនជាតិខ្មែរនៅប្រទេសកម្ពុជា បញ្ឈប់ការរើសអើងខ្មែរក្រោម និងយល់ថាខ្មែរក្រោមគឺជាជនជាតិខ្មែរ។ «សំឡេង»
បើទោះជា ទូកងខ្មែរកម្ពុជាក្រោមមានជ័យ បានឈ្នះ ឬមិនបានឈ្នះក៏ដោយ ប្រធានគណៈកម្មការទូកង ខ្មែរកម្ពុជាក្រោមមានជ័យ លោក ប៊ុន មុនី នៅតែមានសុទិដ្ឋិនិយម ថា វត្តមានទូកខ្មែរកម្ពុជាក្រោម គឺជាបង្ហាញពីស្មារតីរួបរួមរបស់ជនជាតិខ្មែរ និងគឺជាមោទនភាពរបស់ខ្មែរក្រោម ក្នុងការបង្ហាញពីអត្តសញ្ញាណខ្មែរក្រោម។ គណៈកម្មការទូកង ខ្មែរកម្ពុជាក្រោមមានជ័យ នៅតែបារម្ភអំពីការខ្វះខាតថវិកា ថ្លៃទូកង ដែលមានតម្លៃ៤.៥០០ដុល្លារ។ លោក ប៊ុន មុនី បង្ហើបថា ប្រសិនបើ នៅក្រោយពិធីបុណ្យអុំទូកនេះ នៅមិនទាន់ទទួលបានថវិកាគ្រប់គ្រាន់សម្រាប់សងថ្លៃទូក គណៈកម្មការទូក អាចនឹងស្នើសុំព្រះសង្ឃខ្មែរក្រោម ធ្វើបុណ្យសាមគ្គីមួយ ដើម្បីរ៉ៃបច្ច័យយកទៅសងថ្លៃទូកង៕
ប្រភពអត្ថបទ៖http://www.khmershare.news
Hello, my name is Jack Sparrow. I'm a 50 year old self-employed Pirate from the Caribbean.
0 Comments