កំពូលអធិរាជអាណាចក្រម៉ុងហ្គោលី សង់ស៊ី ខាន់ (Genghis Khan) ត្រូវបានគេចាត់ទុកថាជាអធិរាជសង្រ្គាមដ៏ខ្លាំងបំផុតមួយក្នុងប្រវត្តិសាស្រ្ដពិភពលោក។ ព្រះអង្គជាមេទ័ពដែលអនុវត្តនយោបាយវាតទីនិយម ដោយទ្រង់បានច្បាំងយកនគរ និងតំបន់តូចធំជាច្រើន ដាក់ក្រោមចំណុះរបស់ខ្លួន រហូតបង្កើតបានជាអាណាចក្រម៉ុងហ្គោលី ដែលមានទឹកដីដ៏ធំធេង។
រូបចម្លាក់របស់ព្រះចៅ សង់ស៊ីខាន់
អធិរាជ សង់ស៊ីខាន់ ដែលប្រិយមិត្តមួយចំនួនធ្លាប់ឮឈ្មោះក្នុងសៀវភៅប្រវត្តិសាស្រ្ដ ឬក្នុងខ្សែភាពយន្តនោះ បានកើតក្នុងគ្រួសារប្រជារាស្រ្ដសាមញ្ញ នៅឆ្នាំ១១៦២។ ទ្រង់បានចូលទិវង្គត នៅឆ្នាំ១២២៧ ដោយមូលហេតុ ដែលគ្មានអ្នកណាដឹងច្បាស់។ ចំណែកឯទីតាំងផ្នូររបស់ព្រះអង្គ នៅតែជាអាថ៌កំបាំង តាំងពីសម័យនោះ រហូតដល់សម័យទំនើបនាពេលបច្ចុប្បន្ននេះ ដោយគ្មានអ្នកជំនាញណាម្នាក់ អាចស្រាវជ្រាវរកឃើញនោះឡើយ។
ប្រវត្តិសាស្រ្ដ បានឲ្យដឹងថា ព្រះចៅ សង់ស៊ី ខាន់ បានបញ្ជាឲ្យទាហានបញ្ចុះព្រះសពរបស់ព្រះអង្គ ដោយមិនបន្សល់ទុកស្លាកស្នាម ឬ សញ្ញាបញ្ជាក់ថាជាផ្នូរនោះទេ។ ក្រោយបញ្ចុះ ទាហានដែលយកសពព្រះអង្គទៅបញ្ចុះ បានសម្លាប់មនុស្សទាំងអស់ដែលជួបនៅតាមផ្លូវ ទៅកាន់ទីតាំងផ្នូរនោះ។ មនុស្សដែលសាងសង់ផ្នូរក៏ត្រូវបានសម្លាប់ចោលទាំងអស់ ឯទាហានដែលសម្លាប់ពួកគេ ក៏បានសម្លាប់ខ្លួនតាមក្រោយផងដែរ។
រូបគំនូរនៃព្រះចៅសង់ស៊ីខាន់
រាប់រយឆ្នាំក្រោយមក បុរាណវិទូ និងប្រវត្តិវិទូជាច្រើននាក់ មកពីប្រទេសនានា បានព្យាយាមសិក្សាស្រាវជ្រាវស្វែងរកទីតាំងជាក់លាក់នៃផ្នូររបស់ព្រះអង្គ ប៉ុន្តែគ្មានអ្នកណាអាចរកឃើញនោះទេ។ គេជឿជាក់ថា ផ្នូរដ៏អាថ៌កំបាំងរបស់ព្រះអង្គ មានវត្ថុមានតម្លៃជាច្រើន ដែលធ្វើឲ្យមានមនុស្សជាច្រើន នៅតែចិញ្ចឹមចិត្តចង់រកឲ្យឃើញទីអាថ៌កំបាំងនៃផ្នូររបស់ទ្រង់រហូតមកទល់បច្ចុប្បន្ន។
យ៉ាងណាក្ដី ទោះបច្ចេកវិទ្យាទំនើបយ៉ាងណាក៏ដោយ ក៏ទីតាំងផ្នូររបស់ទ្រង់ នៅតែជាអាថ៌កំបាំងមួយ ក្នុងចំណោមអាថ៌កំបាំងដែលស្រាយមិនទាន់ចេញ។ ក្រុមអ្នកស្រាវជ្រាវខ្លះ បានប្រើផ្កាយរណបថតពីទីអាវកាស រួមទាំងបច្ចេកវិទ្យាជាច្រើនទៀត នៅតែគ្មានអ្នកណាអាចរកឃើញដដែល។
តួអង្គក្នុងរឿងដែលសម្ដែងជាតួព្រះចៅសង់ស៊ីខាន់
បច្ចុប្បន្ន ព្រះចៅ សង់ស៊ី ខាន់ នៅតែត្រូវបានគេចាត់ទុកថាជាវីរបុរសរបស់ម៉ុងហ្គោលី។ រូបចម្លាក់របស់ទ្រង់ មាននៅជាច្រើនកន្លែង ខណៈក្រដាសប្រាក់បច្ចុប្បន្នរបស់ប្រទេសនេះ ក៏មានរូបព្រះអង្គដែរ៕
Source:http://kleykley.sabay.com.kh/article
Hello, my name is Jack Sparrow. I'm a 50 year old self-employed Pirate from the Caribbean.
0 Comments