ហេតុអ្វីបានជាសិស្សរៀនបាននិទ្ទេស “C” ភាគច្រើនជោគជ័យខ្លាំងម្ល៉េះក្នុងជីវិត?

ការសិក្សាពិតជាមានសារសំខាន់សម្រាប់មនុស្សគ្រប់រូប ដូច្នេះហើយបានជាម្នាក់ៗខិតខំរៀនសូត្រយ៉ាងខ្លាំងដើម្បីបានពិន្ទុល្អ និង និទ្ទេសល្អ ខណៈសិស្សជាច្រើនបានលទ្ធផលល្អក្នុងការសិក្សា ក៏មានសិស្សមិនតិចនោះទេ ដែលមានលទ្ធផលមិនល្អ ឬ ធ្លាក់ក៏មាន។

ប៉ុន្តែយ៉ាងណាក៏ដោយ លទ្ធផល ឬ និទ្ទេសនៅសាលាតែម្យ៉ាងមិនអាចកំណត់ទាំងស្រុងថា ជីវិតនរណាម្នាក់ជោគជ័យ ឬ មិនជោគជ័យនោះទេ ព្រោះវាគ្រាន់តែជាចំណែកមួយប៉ុណ្ណោះ។

ជុំវិញប្រធានបទនេះ លោក George W. Bush អតីតប្រធានាធិបតីអាមេរិកធ្លាប់ថ្លែងក្នុងពិធីចែកសញ្ញាប័ត្រនៅសាកលវិទ្យាល័យ Southern Methodistថា៖ «សម្រាប់អ្នកដែលបញ្ចប់ការសិក្សាជាមួយនឹងលទ្ធផលល្អនៅរសៀលនេះ ខ្ញុំសូមនិយាយថា អ្នកធ្វើបានល្អណាស់។ ប៉ុន្តែខ្ញុំសូមប្រាប់ទៅកាន់សិស្សដែលបាននិទ្ទេស C ថា អ្នកក៏អាចក្លាយជាប្រធានាធិបតីដែរ»។

ការលើកឡើងបែបនេះ គឺចង់បញ្ជាក់ថា អ្នកដែលបាននិទ្ទេសខ្សោយមិនប្រាកដថា ជីវិតនឹងបរាជ័យនោះឡើយ ព្រោះរូបលោកផ្ទាល់ក៏មានប្រវត្តិជាសិស្សដែលមានលទ្ធផលសិក្សាមិនសូវល្អប៉ុន្មានដែរ។ ប៉ុន្តែលោក George W. Bush អាចក្លាយជាប្រធានាធិបតី ខណៈមិត្តរួមថ្នាក់ដែលបាននិទ្ទេសល្អជាច្រើនទៀតមិនអាចធ្វើដូច។

បើលោកអ្នកពិនិត្យមើលទៅលើទិដ្ឋភាពជាក់ស្តែងនៅក្នុងសង្គម មានមនុស្សជោគជ័យមិនតិចនោះទេ ទាំងផ្នែកនយោបាយ និង អ្នកជំនួញ (មានលុយរាប់ពាន់លានដុល្លារ)ដែលធ្លាប់ជាសិស្សខ្សោយ ឬ មិនបានបញ្ចប់ការសិក្សាខ្ពង់ខ្ពស់។ និយាយអំពីមេដឹកនាំអាមេរិកវិញ មិនមែនមានតែលោក George W. Bush ម្នាក់ទេដែលមានលទ្ធផលសិក្សាមិនសូវល្អ គឺមានជាច្រើនទៀតដូចជា លោក John F. Kennedy លោក Lyndon B. Johnson លោក George H.W. Bush និង លោក Joe Biden អនុប្រធានាធិបតីអាមេរិក។

បើនិយាយអំពីបុគ្គលជោគជ័យផ្នែកជំនួញវិញ មានជាច្រើនដូចជា លោក Steve Jobs (អតីតនាយកប្រតិបត្តិក្រុមហ៊ុនApple) លោក Mark Zuckerberg (ស្ថាបនិកFacebook) លោក Bill Gates (ស្ថាបនិកក្រុមហ៊ុនMicrosoft) និង មហាសេដ្ឋីលើពិភពលោកផ្សេងទៀត ដែលពួកគេសម្រេចចិត្តបោះបង់ការសិក្សានៅត្រឹមថ្នាក់បរិញ្ញាបត្រ។

អ្នកជំនាញជាច្រើនបានអះអាងថា ភាពវៃឆ្លាតគឺជារឿងសំខាន់ ខណៈលទ្ធផលនៃការសិក្សាល្អមិនបានកំណត់ថា នរណាម្នាក់មានភាពវៃឆ្លាតខ្លាំងកម្រិតណានោះទេ ទាល់តែអនុវត្តជាក់ស្តែងនៅក្នុងសង្គមទើបដឹង។ អ្នកជោគជ័យនៅសាលា គឺដោយសារសមត្ថភាពពិសេសក្នុងការប្រឹងប្រែង ដោយផ្អែកលើប្រព័ន្ធ (សិក្សា)មួយដ៏ជាក់លាក់ ប៉ុន្តែមិនមែនមានន័យថា ពួកគេអាចត្រៀមខ្លួនរួចរាល់ក្នុងការអនុវត្តចំណេះដឹងក្នុងពិភពលោកដ៏ធំល្វឹងល្វើយនេះបានឡើយ។

ភាពជោគជ័យ ទាមទារនូវចំណង់ ការខិតខំប្រឹងប្រែង ភាពវៃឆ្លាត និង លទ្ធភាពក្នុងការយល់ច្បាស់អំពីតម្លៃនៃភាពបរាជ័យ។ ទាំងនេះគឺជាចំណុចដែលនាំឲ្យមនុស្សដែលមានប្រវត្តិរៀនមិនសូវល្អជាច្រើនទទួលបានជោគជ័យក្នុងជីវិត។ ពួកគេយល់ច្បាស់ អំពីវិធីក្នុងការតស៊ូ ហើយព្យាយាមជំនះរាល់ឧបសគ្គ លើសពីមនុស្សដទៃទៀត។

ប៉ុន្តែយ៉ាងណាក៏ដោយ ការទទួលបានពិន្ទុខ្សោយ ឬ រៀនអន់នៅសាលាក៏មិនអាចធានាបានថា ពួកគេនឹងជោគជ័យក្នុងជីវិតទាំងអស់នោះដែរ ពោលគឺ អាស្រ័យលើការខិតខំប្រឹងប្រែង និង ភាព ជាក់ស្ដែងពិតប្រាកដនៅក្នុងជីវិតតែប៉ុណ្ណោះ។

គួរចងចាំថា ជោគជ័យពិតប្រាកដមិនមែន ជាពិន្ទុ ឬ លទ្ធផលល្អនៅលើក្រដាសនៅសាលាតែម្យ៉ាងនោះទេ តែគឺជាលទ្ធផលជាក់ស្តែងនៃការអនុវត្តឲ្យចេញជាប្រយោជន៍ក្នុងជីវិត៕

ប្រភព:http://hspeconomicandbusiness.blogspot.com

by: Sea Phealey

ហេតុអ្វីបានជាសិស្សរៀនបាននិទ្ទេស “C” ភាគច្រើនជោគជ័យខ្លាំងម្ល៉េះក្នុងជីវិត?