លោក ហុង សុខហួរ រៀបរាប់ពីការរស់នៅក្នុងគុក និងមានជំនឿថាបក្សសង្គ្រោះជាតិនឹងមិនត្រូវរំលាយនោះទេ
អតីតសមាជិកព្រឹទ្ធសភាគណបក្សប្រឆាំងលោក ហុង សុខហួរ ដែលទើបតែត្រូវបានដោះលែងពីពន្ធនាគារ។ ហេង ជីវ័ន
ភ្នំពេញៈ អតីតសមាជិកព្រឹទ្ធសភាគណបក្សប្រឆាំងលោក ហុង សុខហួរ ដែលទើបតែត្រូវបានដោះលែងពីពន្ធនាគារមានជំនឿថាគណបក្សសង្គ្រោះជាតិនឹងមិនត្រូវរំលាយនោះទេហើយ «អ្នកទោសនយោបាយ» ចំនួន ១៥ នាក់ទៀតក៏នឹងត្រូវដោះលែងផងដែរ។
នៅក្នុងបទសម្ភាសផ្តាច់មុខមួយជាមួយភ្នំពេញ ប៉ុស្តិ៍ កាលពីម្សិលមិញលោក សុខហួរ បានថ្លែងអំពីការជាប់ពន្ធនាគាររយៈពេលជាង ២ ឆ្នាំរបស់លោក បន្ទាប់ពីមានការលើកលែងទោសពីព្រះមហាក្សត្រ នរោត្តម សីហមុនី កាលពីថ្ងៃពុធ។
អង្គុយនៅក្នុងកៅអីក្នុងសួនច្បារក្រោយផ្ទះ លោក សុខហួរ បានរំឭកថា ២៤ ម៉ោងមុនលោកបានជាប់ឃុំនៅក្នុងបន្ទប់ពន្ធនាគារទំហំ ២០ ម៉ែត្រការ៉េ ដែលមានមនុស្សដល់ទៅ ៣០ នាក់។ លោកថ្លែងថា៖ «ខ្ញុំមិនអាចដេកបានក្នុងបរិយាកាសក្តៅ។ ប្រសិនបើខ្ញុំអាចមានកន្លែងទំហំតែកន្លះម៉ែត្រដេក នោះប្រាកដជាអស្ចារ្យណាស់»។ លោក សុខហួរ បានរៀបរាប់អំពីជីវិតនៅក្នុងពន្ធនាគារដែលមានភាពចង្អៀតណែនថា៖ «ខ្ញុំមានពេលវេលាច្រើន»។
ជារៀងរាល់ថ្ងៃលោកក្រោកពីដំណេកនៅម៉ោង ៤ ឬ ៥ ព្រឹកផឹកកាហ្វេ និងអានកាសែត។ នៅម៉ោង ៨ ឆ្មាំពន្ធនាគារបានអនុញ្ញាតឲ្យលោកចេញទៅក្រៅដើរមួយម៉ោង។ ក្នុងអំឡុងពេលនោះលោកដើរប្រហែល ២០ ម៉ែត្រទៅមកៗ។ នៅម៉ោង ១០ ព្រឹកលោកត្រូវទទួលទានអាហារថ្ងៃត្រង់ ហើយបន្ទាប់មកសម្រាក។ នៅម៉ោង ២ ពួកគេអនុញ្ញាតឲ្យលោកចេញដើររយៈពេលមួយម៉ោងម្តងទៀត។ បន្ទាប់មកអាហារពេលល្ងាចនៅម៉ោង ៥ និងនៅពេលល្ងាចលោកស្តាប់វិទ្យុសំឡេងសហរដ្ឋអាមេរិក (VOA) និងវិទ្យុអាស៊ីសេរី។
លោក សុខហួរ បានរំឭកថាលិខិតរបស់លោកផ្ញើទៅលោកនាយករដ្ឋមន្ត្រី ហ៊ុន សែន ថាហាក់បីដូចគ្មានសង្ឃឹម។ «ក្នុងរយៈកាល ២ ឆ្នាំកន្លងទៅខ្ញុំគិតថា សម្តេចនាយករដ្ឋមន្ត្រីបានបន្ថយការខឹងចំពោះខ្ញុំ»។ លោកបន្ថែមថារវាងលោក និងលោកនាយករដ្ឋមន្ត្រី «មិនមានការទាក់ទងនយោបាយ» នោះទេ។
ទាំងលោក សុខហួរ និងអ្នកនាំពាក្យរបស់រដ្ឋាភិបាលបានបដិសេធថា ការដោះលែងលោក សុខហួរ មិនមែនជាផ្នែកនៃការចរចាគ្នាខាងនយោបាយណាមួយនោះទេ។ លោកសុខហួរ បន្តថា៖ «អ្វីដែលខ្ញុំសោកស្តាយគឺថាខ្ញុំបានស្នើសុំតុលាការ អនុញ្ញាតឲ្យខ្ញុំកែកំហុស ប៉ុន្តែតុលាការមិនបានស្តាប់ការពន្យល់របស់ខ្ញុំ»។
អតីតមន្ត្រីគណបក្ស សម រង្ស៊ី រូបនេះត្រូវបានចោទប្រកាន់ពីបទ «ញុះញង់» និង «ក្លែងបន្លំឯកសារ» បន្ទាប់ពីបង្ហោះសន្ធិសញ្ញាព្រំដែនកម្ពុជា វៀតណាម «ក្លែងក្លាយ»។ លោក សុខហួរ បានអះអាងថាលោករកឃើញឯកសារនោះលើអនឡាញហើយសុំឲ្យតុលាការលើកលែងទោសលោកកាលពីពេលនោះ។ ក្តីបារម្ភពិសេសរបស់លោក សុខហួរ គឺបញ្ហាសុខភាពរបស់លោកដែលមានលក្ខណៈកាន់តែដុនដាប។
លោក សុខហួរ បានបញ្ជាក់ថា៖ «ខ្ញុំមិនអាចនៅក្នុងពន្ធនាគារទេដោយសារខ្ញុំមានបញ្ហាសុខភាព»។ លោកបានពន្យល់ថាលោកនឹងទៅប្រទេសបារាំង នាពេលខាងមុខឆាប់ៗនេះដើម្បីព្យាបាលជំងឺ និងដើម្បីជួបកូនរបស់លោកដែលរស់នៅទីនោះ។
ទោះយ៉ាងណាក្តីលោក សុខហួរ បានសន្យាថានឹងត្រឡប់មកកម្ពុជាវិញបន្ទាប់ពីនោះ។ លោក សុខហួរ ថ្លែងថាពេលវេលារបស់លោកនៅក្នុងពន្ធនាគារគឺជា «មេរៀនមួយ» ហើយលោកនៅមិនទាន់សម្រេចចិត្តនៅឡើយទេថានឹងនៅតែធ្វើជាអ្នកនយោបាយទៀតឬយ៉ាងណានោះ។ ទោះបីជាលោកហាក់មានអារម្មណ៍ភ្ញាក់ផ្អើលខ្លាំងចំពោះស្ថានភាពនយោបាយបច្ចុប្បន្ននេះក្តី ក៏លោក សុខហួរ បាននិយាយថាលោកមានជំនឿថាគណបក្សសង្គ្រោះជាតិនឹងមិនត្រូវរំលាយចោលនោះទេ។
លោកបានបញ្ជាក់ទៀតថា៖ «ខ្ញុំក៏មានការភ្ញាក់ផ្អើលផងដែរ ដែលយើងបានឈានមកដល់ចំណុចនេះ ប៉ុន្តែខ្ញុំនៅតែជឿជាក់ថាយើងនឹងមិនឈានដល់ចំណុចសូន្យនោះទេគឺការការរំលាយគណបក្សសង្គ្រោះជាតិ។ ក្នុងនាមជាប្រជាពលរដ្ឋខ្មែរយើងអាចពិភាក្សាគ្នាបាន»។ លោក សុខហួរ បន្ថែមថាលោករំពឹងថា «អ្នកទោសនយោបាយ» ចំនួន ១៥ នាក់ទៀតនឹងត្រូវបានដោះលែងដែរ។ លោក សុខហួរ បានបន្ទរនូវសេចក្តីថ្លែងការណ៍របស់អ្នកនាំពាក្យគណបក្សប្រជាជនលោក សុខ ឥសាន ដែលថាការដោះលែងរូបលោកគឺជាការ «សន្តោសមេត្តា» ហើយលោករំពឹងថាគណបក្សសង្គ្រោះជាតិនឹងត្រូវបានសង្គ្រោះសម្រាប់ហេតុផលដូចគ្នានេះដែរ។ ពលរដ្ឋដែលមានសញ្ជាតិបារាំងផងដែរនេះក៏ទទួលស្គាល់ថាសម្ពាធពីអន្តរជាតិអាចជាផ្នែកមួយដែរ។ «រដ្ឋាភិបាលស្គាល់បន្ទាត់ក្រហមដែលមិនគួរឆ្លងកាត់»។ ប៉ុន្តែនៅពេលសួរថា តើរដ្ឋាភិបាលបារាំងបានជួយក្នុងការដោះលែងរូបលោកនេះឬទេ? លោកឆ្លើយថា៖ «ខ្ញុំមិនអាចបញ្ជាក់បានទេ»។
លោក អៀ សុផល សាស្ត្រាចារ្យផ្នែកទំនាក់ទំនងការទូត និងកិច្ចការពិភពលោកនៅឯសាកលវិទ្យាល័យ Occidental College បាននិយាយថា ពេលវេលានៃការដោះលែងលោក សុខហួរ គឺមានទាំងក្នុងសម្ពាធពីអន្ដរជាតិ និងការចាកចេញខ្លះរបស់សមាជិកគណបក្សសង្គ្រោះជាតិគឺជារឿង «គួរឱ្យសង្ស័យ» ប៉ុន្តែទំនងជារឿងចៃដន្យមួយ។ លោក សុផល ជឿជាក់ថា «លិខិតផ្សះផ្សា» របស់លោក សុខហួរ គឺជាការទទួលខុសត្រូវចំពោះការដោះលែងរូបគាត់ដោយលោកបាននិយាយថាឯកសារនោះគឺជាប្រភេទលិខិតរិះគន់ខ្លួនឯង ដែលគេអាចគិតថាវាជាការស្ថិតក្រោមរបបកុម្មុយនីស្ត»។
ខណៈដែលលោកនាយករដ្ឋមន្ត្រី ហ៊ុន សែន ត្រូវបានគេដឹងថាហាក់បានបន្ធូរបន្ថយបន្តិចវិញ បន្ទាប់ពីបានដាក់សម្ពាធយ៉ាងធ្ងន់ធ្ងរទៅលើគូប្រជែងនយោបាយនោះលោក សុផល បានថ្លែងថាលោកនាយករដ្ឋមន្ត្រីមិនអាចព្យាករបានទៀតទេ។ លោកបានថ្លែងតាមអ៊ីមែលកាលពីយប់ថ្ងៃពុធថា៖ «គាត់ធ្លាប់បានធ្វើដូច្នេះកាលពីមុន ប៉ុន្តែគាត់មិនបានដកជើងរបស់គាត់ចេញពីឈ្នាន់បង្កើនល្បឿននោះទេនាពេលឥឡូវនេះ… ដូច្នេះលំនាំនេះមិនអាចព្យាករបានទៀតទេនាពេលបច្ចុប្បន្ននេះ៕PS/NS
ប្រភពពត៍មាននេះ:http://www.camnews.org/topics/khmernews/
Hello, my name is Jack Sparrow. I'm a 50 year old self-employed Pirate from the Caribbean.
0 Comments