ចប់បាត់ ញុាំសឹងតែមួយជីវិតហើយ មន្រ្តីចុះបង្រ្កាប សិប្បកម្ម ផលិត ទឹកសៀង ទឹកម្ទេស ទឹកត្រីកោះកុង និងទឹកប្រេងខ្យង យីហោ “ហូលាង” ចាប់បានផលិតផលក្លែងក្លាយ និងគ្មានស្តង់ដារ សរុបប្រហែល៩តោន អាចប៉ះពាល់ដល់សុខភាពរបស់អ្នកប្រើប្រាស់

ភ្នំពេញ៖ កាលពីព្រឹកថ្ងៃទី៣០ ខែតុលា ឆ្នាំ២០១៧ សមត្ថកិច្ចបានចុះឆែកឆេរផលិតផលក្លែងក្លាយ និងគ្មានការអនុញ្ញាត សរុបប្រហែល៩តោន​ ដែលអាចប៉ះពាល់ដល់សុខភាពរបស់អ្នកប្រើប្រាស់ ដែលតាំងស្ថិតនៅទីតាំងសិប្បកម្ម យីហោ “ហូលាង” ស្ថិតនៅដីឡូត៍លេខ៣៤៤ ផ្លូវហាណូយ(១០១៩) សង្កាត់ទឹកថ្លា ខណ្ឌសែនសុខ រាជធានីភ្នំពេញ។


បើតាមការអោយដឹងពីសមត្ថកិច្ចបានប្រាប់ថា នៅសិប្បកម្ម យីហោខាងលើមានផលិត ទឹកសៀង ទឹកម្ទេស ទឹកត្រីកោះកុង និងទឹកប្រេងខ្យង១កន្លែង គ្មានស្តង់ដារ ដែលអាចបង្កគ្រោះថ្នាក់ដល់សុខភាពអ្នកប្រើប្រាស់។


មន្ត្រីចុះបង្ក្រាបបានអោយដឹងថា ម្ចាស់ទីតាំងខាងលើឈ្មោះ ប៊ួយ ហូ ដោយទីតាំងនេះម្ចាស់បានសុំច្បាប់ផលិតតែ២មុខប៉ុណ្ណោះ ប៉ុន្តែលួចផលិតច្រើនមុខ និងគ្មានស្តង់ដារត្រឹមត្រូវ រួមមានទឹកសៀង ទឹកម្ទេស ទឹកត្រីកោះកុង និងប្រេងខ្យង ដោយពុំបានសុំចុះបញ្ជីផលិតផល (ចបផ) ជាមួយស្តង់ដារកម្ពុជាឡើយ។


សមត្ថកិច្ចបានអោយដឹងទៀតថា ផលិតផលដែលគ្មានច្បាប់អនុញ្ញាត សរុបប្រហែល៩តោន និងបានបន្តយកទៅពិសោធន៍ រកមើលសារធាតុដែលធ្វើឲ្យប៉ះពាល់ដល់សុខភាពអ្នកប្រើប្រាស់ ដើម្បីកសាងសំណុំរឿងតាមនីតិវិធី។


ដោយឡែកទីតាំងខាងលើ ត្រូវបានបិទទ្វា បញ្ឈប់អោយដំណើរការបណ្តោះអាសន្នផងដែរ៕

Article Source: https://www.khmernews.news