បាត់ដំបង៖ ជនរងគ្រោះដែលបានផ្ញើលុយតាមរយៈក្រុមហ៊ុនវីង ទៅអោយជនមិនស្គាល់មុខដែលបានHack គណនីហ្វេសប៊ុករបស់ប្រធានមន្ទីរព័ត៌មាន ខេត្តបាត់ដំបង ហើយបានឆាតមកខ្ចីប្រាក់ ថាមានធុរៈនៅឯខេត្តសៀមរាប នោះ ត្រូវបានក្រុមហ៊ុនវីង ព្រមចេញសំណងនូវទឹកប្រាក់ចំនួន ៥០០ដុល្លាវិញហើយ កាលពីល្ងាចថ្ងៃទី២៧ ខែតុលា បន្ទាប់ពីលោកស្រីម្ចាស់គណនីបានដាក់ពាក្យប្តឹងនៅស្នងការដ្ឋាននគរបាល ខេត្តបាត់ដំបងដោយបានចោទប្រកាន់ថា អាចមានភ្នាក់ងារវីងណាម្នាក់មានការឃុបឃិតជាមួយជនទុច្ចរិត ដោយបើកប្រាក់មិនចាំ បាច់ផ្ទៀងផ្ទាត់លេខទូរស័ព្ទក៏អាចបើកយកលុយបាន ។
គួរបញ្ជាក់ថា គណនីហ្វេសប៊ុក របស់លោកស្រី ប៉ុក ច័ន្ទធារី ប្រធានមន្ទីរព័ត៌មានខេត្តបាត់ដំបង ត្រូវបានជនមិនស្គាល់មុខហេកចូល កាលពីថ្ងៃទី២៥ ខែតុលា ឆ្នាំ២០១៧ ប្រហែលជាម៉ោង១និង២០នាទីរសៀល ហើយបានធ្វើសកម្មភាពឆាតទៅកាន់ហ្វ្រេនប្រមាណជាង២០នាក់ ដើម្បីខ្ចីប្រាក់ ។
នៅក្នុងនោះដែរ លោក ភី សុខ អនុប្រធានវិទ្យុជាតិចំការចេក ក៏បានចាញ់កលជនសង្គមងងឹតនោះ ដោយបានឆាតទៅសួរនាំអំពីទឹកប្រាក់ដែលខ្ចីនោះ តែត្រូវជនសង្ស័យដែលយកឈ្មោះលោកស្រីទៅប្រើបានតបថា លោកស្រីត្រូវចុះទៅធ្វើវាគ្មិននៅឯខេត្តសៀមរាប ត្រូវការខ្ចីប្រាក់ចំនួន ៥០០ដុល្លារ តែ២ថ្ងៃប៉ុណ្ណោះ និងសងវិញ ។
ក្រោយពីមានការជឿទាំងស្រុងថា ពិតជាអ្នកស្រីប្រធានមន្ទីរព័ត៌មានមែននោះ ទើបលោក ភី សុខ បានផ្ញើតាមរយៈវីងវេរលុយ ទៅអោយលោកស្រីនូវទឹកប្រាក់ ចំនួន៥០០ដុល្លារ ដោយថតបាញ់តាមរយៈឆាតទៅអោយ រួចទើបទូរស័ព្ទទៅសួរលោកស្រីថា បានទទួលលុយហើយឬនៅ ។ ពេលនោះទើបមានការភ្ញាក់ផ្អើល ដោយសារតែលោកស្រីមិនដឹងខ្លួនទាល់តែសោះ ហើយក៏ប្រញ៉ាប់ប្រញ៉ាល់ទៅសាកសួរព័ត៌មានអំពីលុយដែលផ្ញើ ត្រូវជនមិនស្គាល់មុខដកយកបាត់ទៅហើយ ។
ដោយសារតែបញ្ហានេះហើយ ទើបលោក ភី សុខ បានទាក់ទងតាមរយៈទូរស័ព្ទ ទៅសាកសួរប្រធានក្រុមហ៊ុនវីងទាំងប្រចាំខេត្តបាត់ដំបង ក៏ដូចជាប្រធានក្រុមហ៊ុន ដែលនៅទីក្រុងភ្នំពេញ ដើម្បីចង់ដឹងថា ហេតុអ្វីបានជាជនទុច្ចរឹតដែលគ្មានលេខទូរស័ព្ទផង ក៏អាចដកប្រាក់បាន ? ព្រោះលេខទូរស័ព្ទនៅនឹងដៃរបស់លោកស្រីប្រធានមន្ទីរសោះ ។
ទីបំផុត នៅវេលាម៉ោង៥ល្ងាច ថ្ងៃទី២៧ ខែតុលា ឆ្នាំ២០១៧ ក្រុមហ៊ុនវីង ដែលនៅទីក្រុងភ្នំពេញ បានទាក់ទងមកលោក ភី សុខ ដោយព្រមចេញសំណងដែលខាតបង់នូវទឹកប្រាក់៥០០ដុល្លារនោះ ទៅឲ្យលោក ភី សុខ វិញ ដោយបានកំណត់អោយ លោកកាន់ក្រដាស់ដែលខ្លួនបានដាក់ប្រាក់ ទៅកាន់បញ្ជរដដែល ដើម្បីបើកយកប្រាក់វិញ។
ទាំងនេះ សបញ្ជាក់អោយឃើញថា ពិតជាមានភ្នាក់ងារវីងណាម្នាក់ ដែលបានបើកប្រាក់ទៅអោយជនទុច្ចរិតយ៉ាងពិតប្រាកដ ដោយមិនបានផ្ទៀងផ្ទាត់នូវលេខទូរស័ព្ទ ដែលត្រូវយកមកបើកប្រាក់៥០០ដុល្លារនោះ ដូចនេះទើបជនរងគ្រោះ បានស្នើសុំអោយក្រសួងមានសមត្ថកិច្ច ធ្វើការសហការជាមួយក្រុមហ៊ុនវីង ដើម្បីតាមចាប់ខ្លួនជនទុច្ចរិតនោះ យកមកផ្តន្ទាទោសអោយបានតាមផ្លូវច្បាប់ ៕
Text Article:http://merlkomsan.tv
Hello, my name is Jack Sparrow. I'm a 50 year old self-employed Pirate from the Caribbean.
0 Comments